NAS  RA  BYURAKAN  ASTROPHYSICAL  OBSERVATORY  AFTER  V. A.  AMBARTSUMIAN  (NATIONAL  VALUE)

ՀՀ  ԳԱԱ  Վ․ Հ․  ՀԱՄԲԱՐՁՈՒՄՅԱՆԻ  ԱՆՎԱՆ  ԲՅՈՒՐԱԿԱՆԻ  ԱՍՏՂԱԴԻՏԱՐԱՆ  (ԱԶԳԱՅԻՆ  ԱՐԺԵՔ)

ՀԱՅ  ENG

Մամուլի հաղորդագրություն


ՀՀ ԳԱԱ Վ. Համբարձումյանի անվ. Բյուրականի աստղադիտարան
Մամուլի հաղորդագրություն 09.11.2020


«Ես Արև անունով աղջիկ և Լուսին անունով տղա ունեմ»
Ալենուշ Տերյան

ԱԼԵՆՈՒՇ ՏԵՐՅԱՆԻ 100-ԱՄՅԱԿԸ

Այսօր կլրանար աստղաֆիզիկոս Ալենուշ Տերյանի 100-ամյակը:

Ալենուշ Տերյանն Իրանում աստղաֆիզիկայի առաջին պրոֆեսորն էր: Նա ծնվել է Թեհրանում 1920 թվականի նոյեմբերի 9-ին: Նրա հայրը թարգմանիչ էր և պարսկերենից հայերեն է թարգմանել Իրանի հայտնի բանաստեղծ Ֆիրդուսիի «Շահնամեն», իսկ մայրը կրթությունը ստացել է Շվեյցարիայում գրականության բնագավառում:

Ալենուշ Տերյանը տարրական կրթությունը ստացել է հայկական դպրոցում, իսկ ավագ դպրոցն ավարտել է Սպահանում: 1947թ. ավարտել է Թեհրանի համալսարանը, որտեղ էլ աշխատանքի է ընդունվել որպես լաբորատորիայի պատասխանատու: Այնուհետև նա դիմել է կրթաթոշակի, սակայն նրա հայտը մերժել են, քանի որ նա կին էր: Այսպիսով, ընտանեկան միջոցներով նա Ֆրանսիա է մեկնում և շարունակում կրթությունը Սորբոնի համալսարանում: 1956թ. Ա․ Տերյանը ստացել է գիտությունների թեկնածուի աստիճան: Նրան առաջարկել են դասավանդել Սորբոնում, սակայն նա նախընտրել է վերադառնալ Իրան, որտեղ և Թեհրանի համալսարանում նշանակվել է թերմոդինամիկայի դոցենտ:

1964թ. դարձել է պրոֆեսոր, 1966թ.-ին Թեհրանի համալսարանի երկրաֆիզիկայի ֆակուլտետի անդամ և նշանակալից դեր խաղացել Իրանում առաջին արեգակնային աստղադիտարանի հիմնադրման գործում: 1969թ.-ին Տերյանը ղեկավարել է Թեհրանի համալսարանի երկրաֆիզիկայի ֆակուլտետի արեգակնային ֆիզիկայի գիտահետազոտական խումբը: Նա առաջինն էր, ով Իրանում դասավանդել է աստղաֆիզիկա:

Ա․ Տերյանը վարժ տիրապետում էր ֆրանսերենին, պարսկերենին և հայերենին, ինչպես նաև գիտեր թուրքերեն և անգլերեն: 30 տարի դասավանդելուց հետո Ալենուշ Տերյանը թոշակի է անցնում իր իսկ ցանկությամբ: Նա չի ամուսնանում և իր տունը կտակում է Ջուղայի հայերին և այն ուսանողներին, ովքեր չունեին բարվոք կացարան:

Ա․ Տերյանն իր կյանքի վերջին տարիներն անցկացրել է ծերանոցում և վախճանվել է 2011թ. մարտի 4-ին:

Մելինե Ասրյան




Հասցե՝ ՀՀ, Արագածոտնի մարզ, Բյուրական, 0213
Հեռ․՝ (+374-91) 195901
Էլ․ հասցե՝ observ@bao.sci.am

Բոլոր իրավունքները պաշտպանված են © 2017-2020, Բյուրականի աստղադիտարան