Մամուլի հաղորդագրություն

      

ՀՀ ԳԱԱ Վ. Համբարձումյանի անվ. Բյուրականի աստղադիտարան
Մամուլի հաղորդագրություն 11.09.2020


ԱՎԱՐՏՎԵՑ ԲՅՈՒՐԱԿԱՆՅԱՆ 7-ՐԴ ՄԻՋԱԶԳԱՅԻՆ ԱՄԱՌԱՅԻՆ ԴՊՐՈՑԸ

Այսօր՝ սեպտեմբերի 11-ին, ավարտվեց «Բյուրականյան 7-րդ միջազգային ամառային դպրոցը» (7BISS), որը կրում էր «Աստղագիտութունը և տվյալների գիտությունը» խորագիրը (https://www.bao.am//meetings/meetings/SS2020/index.html)։ Այս տարի համավարակի պատճառով դպրոցն անցկացվում էր առցանց։

Դպրոցին ընդհանուր առմամբ մասնակցեցին 50 երիտասարդ աստղագետ և ուսանող և 12 դասախոս 21 երկրներից։ Բացի այդ, հնարավոր եղավ որոշակիորեն ապահովել նաև հանրության մասնակցությունը։

Ամառային դպրոցի շրջանակներում մասնակիցները հնարավորություն ունեցան լսելու հայտնի մասնագետների դասախոսությունները և մասնակցելու նրանց գործնական դասերին, որոնք վերաբերում էին աստղագիտական շրջահայություններին, զանազան աստզաֆիզիկական թեմաներին, աստղագիտական տվյալների թվայնացմանը, աստղավիճակագրությանը, աստղաինֆորմատիկային, վիրտուալ աստղադիտարաններին և այլն։ Հայտնի դասախոսների թվում էին Միջազգային աստղագիտական միության (IAU) փոխնախագահ Աջիթ Քեմբհավին (Հնդկաստան), աստղաինֆորմատիկայի համահիմնադիր Աշիշ Մահաբալը (ԱՄՆ), Վիրտուալ աստղադիտարանների միջազգային ալյանսի (IVOA) նախագահ Չենժոու Կուին (Չինաստան) և այլք:

Ամառային դպրոցի փակմանը հայտնի դարձան նաև այն 3 մասնակիցների անունները, ովքեր առանձնացել էին իրենց ներածական ելույթներով։ Նրանք են՝ Մարտա Օբոլենցեվան՝ Սանկտ Պետերբուրգի պետական համալսարանից (Ռուսաստան), Մարիա Բաբախանյան Ստոնը՝ Տուրկուի համալսարանից (Ֆինլանդիա) և Վանեսա Ռամիրեսը՝ Լայդենի համալսարանից (Նիդերլանդներ): Նշենք, որ հաղթողներն ընտրվել են դասախոսների և մյուս մասնակիցների քվեարկության արդյունքում։

Բոլոր ելույթները, ներառյալ վերոնշյալ երեքը, հասանելի են համացանցում` https://www.bao.am//meetings/meetings/SS2020/programme.html։

Բյուրականյան ամառային դպրոցը ևս մեկ անգամ ապացուցեց աստղագիտության կարևորությունը տվյալների գիտության (Data Science) և էլեկտրոնային գիտության (e-Science) զարգացման գործում։

Մելինե Ասրյան



Address: 0213, Byurakan, Aragatzotn Province, Republic of Armenia
Tel: (+374-91) 195901
Email: observ@bao.sci.am

Copyright © 2017-2020, Byurakan Astrophysical Observatory