Մամուլի հաղորդագրություն |
  |
ՀՀ ԳԱԱ Վ. Համբարձումյանի անվ. Բյուրականի աստղադիտարան
Մամուլի հաղորդագրություն 20.02.2023
ԿՈՊԵՌՆԻԿՈՍԻ 550-ԱՄՅԱԿԸ
Նիկոլայ Կոպեռնիկոսը բոլոր ժամանակների մեծագույն աստղագետներից մեկն էր։ Նա հայտնի է արևակենտրոն տեսությունը ձևակերպելու և ժամանակի աստղագիտության մեջ մի ամբողջ գիտական հեղափոխություն նախաձեռնելու համար:
Կոպեռնիկոսը ծնվել է 1473թ-ի փետրվարի 18-ին Լեհաստանում։ Նա նախ սովորել է հայրենիքում, ապա կրթությունը շարունակել Իտալիայի համալսարաններում, որտեղ ուսումնասիրել է փիլիսոփայություն, մաթեմատիկա, բժշկագիտություն և աստղագիտություն: Ավարտելով ուսումը՝ Կոպեռնիկոսը վերադարձել է Լեհաստան և զբաղվել աստղագիտությամբ: Նրա օրոք դեռևս տիրապետող էր այն տեսակետը, որ Երկիրն անշարժ է և գտնվում է Տիեզերքի կենտրոնում: Շուտով Կոպեռնիկոսը հասկացավ, որ աշխարհի մասին այդ պատկերացումը չի համապատասխանում աստղագիտական դիտարկումներին: Նա բացահայտեց, որ բոլոր մոլորակները, այդ թվում նաև Երկիրը, պտտվում են Արեգակի և միաժամանակ՝ իրենց առանցքի շուրջը:
Իր արևակենտրոն կառուցվածքի տեսությունը Կոպեռնիկոսը շարադրեց «Երկնոլորտների պտույտների մասին» գրքում, որը լույս տեսավ 1543թ-ին` նրա մահից մի քանի օր առաջ: Այդ շրջանում Կոպեռնիկոսի գաղափարները համարվում էին շատ վտանգավոր, որովհետև մարտահրավեր էին հին հույներից ժառանգած Տիեզերքի երկրակենտրոն կառուցվածքի տեսությանը և եկեղեցական պատկերացումներին, ըստ որոնց՝ Աստված Երկիրը ստեղծել է որպես աշխարհի կենտրոն: Ուստի եկեղեցին Կոպեռնիկոսի գիրքը համարեց արատավոր և 1616թ-ին այն ընդգրկեց կաթոլիկների համար արգելվող գրքերի ցանկում: Այժմ որոշ ուսումնասիրողներ այդ գիրքը համարում են ժամանակակից աստղագիտության մեկնարկային կետ։
Մելինե Ասրյան
