Մամուլի հաղորդագրություն |
  |
ՀՀ ԳԱԱ Վ. Համբարձումյանի անվ. Բյուրականի աստղադիտարան
Մամուլի հաղորդագրություն 13.04.2023
ՓՈԽԸՄԲՌՆՄԱՆ ՀՈՒՇԱԳԻՐ ԲՅՈՒՐԱԿԱՆԻ ԱՍՏՂԱԴԻՏԱՐԱՆԻ ԵՎ ՀԱՄԱՇԽԱՐՀԱՅԻՆ ՏՎՅԱԼՆԵՐԻ ՀԱՄԱԿԱՐԳԻ ՄԻՋԵՎ
Օրերս Բյուրականի աստղադիտարանի և Միջազգային գիտական խորհրդի (ISC) Համաշխարհային տվյալների համակարգի միջև (WDS) կնքվել է փոխըմբռնման հուշագիր։
Հուշագրի նպատակն է սահմանել այն պայմանները, որոնցով Բյուրականի աստղադիտարանը (ԲԱ) միանում է Համաշխարհային տվյալների համակարգին՝ որպես գործակից անդամ: ԲԱ-ի նպատակն է նպաստել Համաշխարհային տվյալների համակարգին և համագործակցել նրանց ղեկավար մարմնի՝ Գիտական կոմիտեի (WDS-SC) հետ՝ ապահովելու որակյալ տվյալների և տվյալների համակարգերի երկարատև կառավարումն ու տրամադրումը միջազգային գիտական հանրությանը և այլ շահագրգիռ կողմերին: Մասնավորապես, ԲԱ-ն ունի հսկայական տվյալների շտեմարան՝ Մարգարյանի շրջահայության շուրջ 40 մլն սպեկտրները, որոնք աշխարհում ամենամեծ թիվն են կազմում։ Այս շրջահայությունը 2011թ-ից ներգրավված է ՅՈՒՆԵՍԿՕ-ի փաստագրական արժեքների «Աշխարհի հիշողություն» միջազգային գրանցամատյանում։ ԲԱ-ն ունի նաև 1946-1991թթ․ տարբեր աստղադիտակներով (2․6մ, 1մ Շմիդտի համակարգի և այլ) դիտումների արդյունքների՝ լուսանկարչական թիթեղների և այլ կրիչների թվայնացված շտեմարան։ 2005թ-ից գործում է Հայկական վիրտուալ աստղադիտարանը (ՀՎԱ, ArVO), որը նաև Վիրտուալ աստղադիտարանների միջազգային ալյանսի (ՎԱՄԱ, IVOA) լիիրավ անդամ է։
Մելինե Ասրյան
