Մամուլի հաղորդագրություն

ՀՀ ԳԱԱ Վ. Համբարձումյանի անվ. Բյուրականի աստղադիտարան
Մամուլի հաղորդագրություն 01.05.2023

ՀԱՅ-ՎՐԱՑԱԿԱՆ ԱՍՏՂԱԳԻՏԱԿԱՆ ԿՈԼՈՔՎԻՈՒՄ՝ ՆՎԻՐՎԱԾ ԼՅՈՒԴՎԻԳ ՄԻՐԶՈՅԱՆԻ 100-ԱՄՅԱԿԻՆ

Այսօր Բյուրականի աստղադիտարանում (ԲԱ) տեղի ունեցավ արդեն ավանդույթ դարձած հայ-վրացական (Բյուրական-Աբասթուման) XV համատեղ կոլոքվիումի պաշտոնական բացման արարողությունը։ Այս տարի այն նվիրված է հայ անվանի աստղագետ Լյուդվիկ Միրզոյանի ծննդյան 100-ամյակին։

Ողջույնի խոսքով հանդես եկան ԲԱ տնօրեն Արեգ Միքայելյանը և Աբասթումանի աստղադիտարանի տնօրեն Ռեվազ Ճանիշվիլի, որին հաջորդեց առաջին նստաշրջանը։ Կոլոքվիումի նստաշրջաները վերաբերում են տարբեր թեմաների՝ Արեգակնային ֆիզիկա, աստղեր և միգամածություններ, գալակտիկաներ և տիեզերաբանություն, ինչպես նաև տեսական աստղաֆիզիկա։

Նշենք, որ հայ և վրացի աստղագետների գիտական համագործակցությունն ու բարեկամությունը հաստատվել է դեռևս 1930-ական թվականներին՝ ԲԱ հիմնադիր Վիկտոր Համբարձումյանի (1908-1996) և Աբասթումանի աստղադիտարանի հիմնադիր Եվգենի Խարաձեի (1907-2001) ջանքերով։

Այս կոլոքվիումը հերթական անգամ հարթակ է հանդիսանում հայ և վրացի աստղագետների միջև փորձի փոխանակման և գոյություն ունեցող կապի ամրապնդման համար։ Կոլոքվիումի մասին առավել մանրամասն կարող եք իմանալ հետևյալ կայքէջում՝ https://www.bao.am/meetings/meetings/BAO-AbAO/index.html

Մելինե Ասրյան