Մամուլի հաղորդագրություն

ՀՀ ԳԱԱ Վ. Համբարձումյանի անվ. Բյուրականի աստղադիտարան
Մամուլի հաղորդագրություն 24.07.2023

ԱՎԱՐՏԻՆ ՄՈՏԵՑԱՎ 9-ՐԴ ԲՅՈՒՐԱԿԱՆՅԱՆ ԳԻՏԱՃԱՄԲԱՐԸ

Օրերս ավարտվեց 9-րդ Բյուրականյան գիտաճամբարը։ Այս տարի այն անցկացվեց հուլիսի 16-22-ին։

Գիտաճամբարին մասնակցեցին 9-12 տարեկան 35 շնորհալի պատանիներ ՀՀ տարբեր մարզերից՝ Արմավիր, Արագածոտն, Գեղարքունիք, Սյունիք, Տավուշ և Երևան։ Ինչպես ամեն տարի, ճամբարին հատուկ ընդգրկված էին նաև Հայ օգնության ֆոնդի (ՀՕՖ) կողմից անցկացված ֆիզիկայի մրցույթի հաղթողները (այս անգամ Սիսիանից) և Բյուրական գյուղի երեխաները։

Կազմակերպիչներն էին ՀՀ ԳԱԱ Վ. Համբարձումյանի անվան Բյուրականի աստղադիտարանը (ԲԱ), Հայկական աստղագիտական ընկերությունը (ՀԱԸ): Ծրագրի իրականացմանը օժանդակեց ՀՕՖ-ը։

Գիտաճամբարի շրջանակներում տեղի ունեցան աստղագիտական հանրամատչելի ինտերակտիվ դասախոսություններ, զրույց աստղագիտության և առասպելաբանության կապի մասին, անգլերենի լեզվի պարապմունքներ, ինտելեկտուալ խաղեր, այցելություններ։ Բացի այդ երեխաները հնարավորություն ունեցան այցելել աստղադիտարանի խոշորագույն 2.6մ աստղադիտակ, Վիկտոր Համբարձումյանի տուն-թանգարան, կատարել գիշերային դիտումներ փոքր աստղադիտակներով, կատարել էքսկուրսիաներ Տեղերի վանք, Օշական, Հայոց Տառեր, ինչպես նաև լավ ժամանակ անցկացնել լողավազանում, մասնակցել մարզական խաղերի և մրցույթների։

Գիտաճամբարի փակման արարողությանը, համաձայն ընդունված կարգի, կատարվեց անցկացված մրցույթների արդյունքների ամփոփումը։ Ճամբարի կազմակերպիչ Սոնա Ֆարմանյանը և Հայ օգնության ֆոնդի (ՀՕՖ) փոխտնօրեն, ՀՕՖ-ի կրթական և գիտական ծրագրերի ղեկավար Էդուարդ Կարապետյանը երեխաներին հանձնեցին մրցանակներ։

Նշենք, որ գիտաճամբարը մասնակիորեն ֆինանսավորվում է Հայ օգնության ֆոնդի կողմից:

Մելինե Ասրյան