Մամուլի հաղորդագրություն

ՀՀ ԳԱԱ Վ. Համբարձումյանի անվ. Բյուրականի աստղադիտարան
Մամուլի հաղորդագրություն 16.09.2023

ԱՎԱՐՏԻՆ ՄՈՏԵՑԱՎ ՏԱՐԱԾԱՇՐՋԱՆԱՅԻՆ 3-ՐԴ ԵՎ ՄԻՋՏԱՐԱԾԱՇՐՋԱՆԱՅԻՆ 1-ԻՆ ԱՍՏՂԱԳԻՏԱԿԱՆ ԱՄԱՌԱՅԻՆ ԴՊՐՈՑԸ

Ավարտին մոտեցավ Բյուրականի աստղադիտարանում (ԲԱ) անցկացվող տարածաշրջանային 3-րդ և միջտարածաշրջանային 1-ին աստղագիտական ամառային դպրոցը։

Սեպտեմբերի 11-15-ին 34 երիտասարդ աստղագետ Հարավարևմտյան և Կենտրոնական Ասիայի տարածաշրջանային աստղագիտական և Արաբական աշխարհի տարածաշրջանային աստղագիտական կենտրոնների երկրներից համախմբվել էին ԲԱ-ում՝ «Աստղագիտական դիտումներից մինչև գիտական հոդվածների պատրաստում» թեմայի շուրջ: Նրանց թվում էին ներկայացուցիչներ Հայաստանից, Իրանից, Ռուսաստանից, Վրաստանից, Ղազախստանից, Հորդանանից, Թունիսից և Թուրքիայից։ Դպրոցի շրջանակներում ուսանողները հնարավորություն ունեցան դիտումներ կատարելու ԲԱ 1մ և 2,6 մ հայելու տրամագծով աստղադիտակների միջոցով, մասնակցելու տվյալների մշակմանը, վերլուծությանն ու վիճակագրությանը նվիրված գործնական պարապմունքների, ինչպես նաև քննարկելու բազմաթիվ թեմաներ:

Մասնակիցների համար դասախոսություններով հանդես եկան, այնպիսի գիտնականներ, ինչպիսիք են Միշել Դենեֆելդը Ֆրանսիայից, Դավիդ Էլիան Իտալիայից, Լասլո Կիշը Հունգարիայից, Սյուզաննա Ռենդալը Գերմանիայից, Ան Ռուիմին Ֆրանսիայից, Օլեգ Մալկովը և Դանա Կովալյովան ՌԴ-ից, Ավնի Խասավնեն Հորդանանից, ինչպես նաև ԲԱ գիտնականներից մի քանիսը։

Դպրոցի կազմակերպիչներն ու հովանավորներն էին ԲԱ-ն, Հարավարևմտյան և Կենտրոնական Ասիայի տարածաշրջանային աստղագիտական կենտրոնը, Արաբական աշխարհի տարածաշրջանային աստղագիտական կենտրոնը, ՀՀ ԿԳՄՍ Բարձրագույն կրթության և գիտության կոմիտեն, Եվրոպական «Աստղագիտություն և աստղաֆիզիկա» (Astronomy & Astrophysics, A&A) հանդեսը, Եվրոպական հարավային աստղադիտարանը, EDP Sciences հրատարակչությունը։

Նշենք, որ ամառային դպրոցի բոլոր ելույթները հասանելի կլինեն նաև համացանցում:

Մելինե Ասրյան