Մամուլի հաղորդագրություն |
  |
ՀՀ ԳԱԱ Վ. Համբարձումյանի անվ. Բյուրականի աստղադիտարան
Մամուլի հաղորդագրություն 13.12.2023
ԲՅՈՒՐԱԿԱՆԻ ԱՍՏՂԱԴԻՏԱՐԱՆԻ ՏԱՐԵԿԱՆ ՀԱՇՎԵՏՈՒ ԺՈՂՈՎԸ
Երեկ տեղի ունեցավ Բյուրականի աստղադիտարանի (ԲԱ) տարեկան ընդհանուր հաշվետու ժողովը: Ներկաների թվում էին ԲԱ աշխատակիցները, ՀՀ ԳԱԱ ֆիզիկայի և աստղաֆիզիկայի բաժանմունքի ակադեմիկոս-քարտուղար Ռադիկ Կոստանյանը, բաժանմունքի գիտական քարտուղար Նարինե Դավիդյանը, ՀՀ ԳԱԱ Ֆիզիկական հետազոտությունների ինստիտուտի տնօրեն Արամ Պապոյանը, ՀՀ ԳԱԱ Ռադիոֆիզիկայի և էլեկտրոնիկայի ինստիտուտի տնօրեն Տիգրան Զաքարյանը, ՀՀ ԳԱԱ Ֆիզիկայի կիրառական պրոբլեմների ինստիտուտի տնօրեն Վահան Քոչարյանը։
ԲԱ տնօրեն Արեգ Միքայելյանը ներկայացրեց ԲԱ 2023թ-ի գիտական և գիտակազմակերպական գործունեությունը՝ անդրադառնալով թե՛ գիտական արդյունքներին և համագործակցություններին և թե՛ աստղադիտարանի բոլոր կառույցներում կատարված աշխատանքներին։ Ժողովին ելույթներով հանդես եկան ԲԱ գիտահետազոտական բաժինների ղեկավարները՝ ամփոփ ներկայացնելով համապատասխան բաժինների գրանցած արդյունքները:
Դատելով բոլոր ցուցանիշներից` ԲԱ-ն շարունակում է մնալ Հայաստանի ամենաարդյունավետ գիտական ինստիտուտներից մեկը, թե՛ հրապարակումներով, թե՛ գիտաժողովներին մասնակցությամբ, թե՛ կազմակերպած սեմինարներով, թե՛ անցկացրած միջոցառումներով, թե՛ գործուղումներով և թե՛ ընդունած արտասահմանյան հյուրերով։
Համաձայն ավանդույթի՝ ժողովի ավարտին հանձնվեցին մի շարք մրցանակներ՝ Հայկական աստղագիտական ընկերության (ՀԱԸ, ArAS) 2023թ-ի տարեկան մրցանակը և Գալիլեյան ուսուցիչների վերապատրաստման ծրագրի (GTTP) միջազգային հավաստագրերը։ Ինչպես նաև հայտնի դարձավ Գիտական (աստղագիտական) լրագրության մրցույթի հաղթողի անունը՝ Հանրային ռադիոյի ավագ լրագրող Հասմիկ Դիլանյան։ Գիտական լրագրության մրցույթի ամփոփումը կկայանա 2023թ-ի հունվարին, որի ընթացքում էլ կհանձնվի մրցանակը:
Մելինե Ասրյան
